Aygün Kazımovaya isə təklif olmayıb
“Best model of Azerbaijan-2008”in final mərasiminin münsiflər heyətində yerli sənətçilərimizdən İlhamə Quliyeva təmsil olunacaq. Lent.az-ın məlumatına görə, bu barədə yarışmanın prezidenti Ruhi məlumat verib. Onun sözlərinə görə, İlhamə xanıma böyük hörməti var və onun zövqünü çox bəyənir: “İlhamə xanım jüridə iştirakı ilə bağlı istəyimi hələki bildirməmişəm. Mən o xanımın vurğunuyam. O, böyük sənətçidir, məni ilk gündən çox dəstəkləyib. Onun geyimləri, ayaqqabıları, çantaları zövqlə seçilir”.
Jüridə yarışmanın əvvəlki təşkilatçılarından olan Aygün Kazımovanın iştirak edib-etməyəcəyinə gəlincə, Ruhi Aygün xanıma böyük hörməti olduğunu və hələki belə söz-söhbətin olmadığını, ona belə təkliflə müraciət etmədiyini bildirdi.
Ruhi, “Best model of Azerbaijan-2008”ə bu il gələn iştirakçıların sayının əvvəlki illərlə məüqayisədə çox olduğunu və bunu model yarışmalarına insanların marağının artması ilə izah etdi: “İştirakçıların sayı çoxdur və inanmıram iki günə seçim turunu başa vuraq. Bu iş haqqında çox söz-söhbətlər yayılır. Bəlkə də bu söz-söhbətlər model yarışmasının bizdə hələ tam formalaşmaması ilə bağlıdır. Bəlkə də mən “hacıxanım” olduğuma görə analar qızlarına müsabiqəyə qatılmağa icazə verirlər”.
Qeyd edək ki, “Best model of Azerbaijan-2008”in final gecəsinin Heydər Əliyev adına Sarayda keçirilməsi nəzərdə tutulub. Həmin gün yerli sənətçilərimizlə yanaşı, xarici müğənnilərin də iştirakı gözlənilir. Final şousu Türkiyənin tanınmış xoreoqrafı Tamər Kurtər, səhnə dekorasiyası isə azərbaycanlı memar Rəfael Abdullayev tərəfindən hazırlanacaq.
Nigar Məmmədli
LENT.AZ